أحسنلى علشان متجننش
أألف أحزانى ألحان
و ألبس نضاره ع الوش
أدارى عيونى ماعتش تبان
و أخلى قلمى مايفكرش
وأقلبه لعود و كمان
أندن بيهم على أحزانى
أسليها لتنسانى
أو تهجرنى هى كمان
زى بقيت خلانى
و الحبايب و اللى خان
أعيش إزاى أنا من غيرها؟
و مين غيرها يعرف عنوانى
احزانى دى كتر خيرها
مونسانى و ملزمانى
إن غابت لحظه عن قلبى
يبقى اكيد قلبى الغلطان
و يبقى الذنب ده ذنبى
و حقها على راسى كمان
إزاى تتجرأ أشجانى
تحلم ان يوم تفرح؟
و يكون ليها في الفرح مطرح؟
طول عمرى مع احزانى بسرح
و ندور نتأمل فى المخاليق
فى اللى مايعرفش غير يجرح
و اللى ماعدش لأخوه بيطيق
واللى بينافق نفسه
و عامل فيها حبيب و صديق
ندور نتأمل فى الوشوش
فى اللى ماعدش بيعرف يضحك
و هو طول العمر بشوش
و اللى لسه ماسك نفسه
و اللى اتجنن ..بقى مرووش؟
و مين محروم و مين عيان
و مين ضحكت عليه طيبته
و من خيبته عايش إنسان؟
و مين فى الهموم مصلوب
و شارب اكتر م المطلوب
و مين مسجون و مين سجان؟
و مين أدى فى الأحزان؟
ونرجع تانى انا و الاحزان
ننام و نقوم و نقوم و ننام.
ليست هناك تعليقات:
إرسال تعليق