ـــــــــــــــــــــــــــــــــــــــــــــــــــــــــــــــــــــــــ
ومن غيرك يا امه
في الدنيا رباني
وكبرنى وعلمنى وقوانى
ومن غيرك يا ست الكل
داق المرار .. شاف الذل
عشان اكبر وأكون إنسان
رجل جدع ما اكنش جبان
بتربيتك وتعليمك أكون عنوان
لأهلي ووطني وديني كمان
كبرت يا أمه على إيدك
ومش ناسي وجعك وتنهيدك
ووعدك ليه ووعيدك
وفرحك بيه لما انجح
طب فاكره زمان يا أمه
لما اغلط تقولي خلاص
تسامحي وتنصحي بإخلاص
اجرى عليكي وابوس رجليكي
تمدي ايديكي وتمسحيلي الراس
يامه في لمستك كل الإحساس
وتقولى يا ضنايا انت كل منايا
مليش غيرك في الدنيا تركه
وارد واقولك يا امه
انتى الخير والبركة
تقولي يابني زمانى راح
اسمع واعرف الفكرة
انا يمكن ما اعش لبكره
يابني انت سندي وضهري
واقولك يامه كفاياكي كلام
وابوس ايديك واغنيلك
واحلف لك على راسي جميلك
وحق ربي مش هيضيع
ولو باعوا هما الوطن
عمري في يوم يا امه ما هبيع
وبعلو الصوت هقول انا حر
رسالتك ليه كانت واضحة
وعارفك دايما مسامحة
نصايحك ليه فوق راسي
في عقلى وقلبي وكراسي
يا امايه يا كل الدنيا
ربي في عمرك يطول
ويعيد الزمان من الأول
عشان افضل اقولك
بحبك يا ست الكل
ـــــــــــــــــــــــــــــ
محسن البحراوي
19-3-2016 م
ليست هناك تعليقات:
إرسال تعليق